Додека децата растат, родителите ќе направат сè за да им објаснат како да ги врзат врвците на чевлите, како да ги разликуваат боите, и како да научат повеќе за сето она што ги опкружува. Честопати, досетливоста на некои родители е навистина за почит. Погледнете ги следниве креативни техники за учење и инспирирајте се за следниот пат кога ќе учите нешто ново со вашето дете.
Бои
Исечете картон или самолеплива хартија во боја во квадрати со големина 8×8 цм. Купете дрвени штипки во боја (или обични, кои подоцна ќе ги обоите во иста боја како картоните/самолепливата хартија), и сега можете да му покажете на вашето дете како да ги разликува и споредува боите со помош на квадратите и штипките.
Врзување врвци
Нацртајте две чевли на парче картон. Направете мали дупчиња со ножици на местата каде што и вистинските чевли имаат дупки, и протнете две врвци на секоја чевла. Сега вашето дете може да вежба врзување чевли во секое време.
Сончев систем
Исечете неколку видови на овошја на парчиња и искористете ги за да направите мал Сончев систем (сликата може да ви помогне да ги организирате „планетите“ правилно). Ова ќе биде здрава закуска за вашето дете, а и одличен начин за да ги научи имињата на планетите.
Џебен буквар
Направете им мал буквар на вашите деца кој секогаш ќе им биде при рака за да се потсетат на азбуката. Најдете две големи копчиња кои ќе послужат како корици за вашата книга. Исечете синџир од хартиени кругови кои ќе бидат иста големина како копчињата. Овие кругови се страниците на вашата книга, и на нив можете да ги напишете буквите од азбуката. Завиткајте го синџирот од кругови и залепете ги краевите на копчињата. Вашиот џебен буквар е готов!
Математика со лего коцки
Лего коцките се одлично помагало за да го научите вашето дете да решава едноставни математички проблеми и за да разбере некои апстрактни концепти. На пример, можете да ги искористите за да му ја објасните разликата помеѓу дропки и цели броеви.