Тајландски рај – Краби

Краби е град сместен на западниот брег од јужниот дел на Тајланд, во заливот Фангнга.

Се наоѓа во провинцијата Краби, и е нејзин административен центар. Во Краби живеат околу 25 000 жители. Тој е индустриски и туристички центар на Тајланд.

Со оглед на тоа дека гледа на Андаманското Море, Краби се наоѓа под влијание на шестмесечна дождовна сезона помеѓу мај и ноември. Просечните температури се многу високи, и се движат од 29-32 целзиусови степени.

Во близина на Краби се наоѓаат околу 200 острови, а на многу од нив може да се пристапи само од море. Некои од нив се целосно ненаселени, а се карактеристични по плажите со бел песок, корални гребени и пештери. Посетата на овие острови и престојот на нив е вистинско уживање.

Градот Краби нуди многу атракции. Сочинет е од интересна архитектура, весели и зафатени луѓе, многу странци и многу повеќе. Ова е најдобро место за шопинг, но и за ноќен живот. Градот е исполнет со барови и клубови за загарантирана забава. Иако Пукет нуди далеку побогат ноќен живот, за оние на кои не им е до патување во друг град, Краби ќе биде сосема доволно.

Краби е место за уживање и забава. Околината на Краби е богата со атракции кои секоја година привлекуваат голем број на луѓе од целиот свет. Прекрасни плажи, егзотични острови, весели луѓе, највкусна храна… Постои ли нешто подобро за совршено патување?