← НАЗАД НА БОЗА

Пет работи за кои вашите родители биле во право

Пет работи за кои вашите родители биле во право
669 Читања

Кога сте навистина мали родителите употребуваат низа лаги за да ве заштитат од разни опасности и болести, но кога ќе потпораснете искрено ви кажуваат како стојат работите и пробуваат да ве научат на лекции што треба да ви помогнат да ги надминете проблемите.

Секако, кога ви зборуваат не им верувате, но подоцна ќе видите дека комплетно биле во право. Сите оние клише одговори што не сте сакале да ги чуете, постојат затоа што вие сте биле дел од клише ситуација.

„Ќе сфатиш кога ќе пораснеш“

Постојат толку многу ситуации што мислите дека ги разбирате кога сте дете или пак само од инает тврдите дека сè ви е јасно. Па така, кога во некоја ситуација ви рекле дека работите ќе ги разберете подобро кога ќе пораснете, тоа можеби сте го сфатиле како навреда, затоа што сте биле сигурни дека имате капацитет да разберете. Фрлете поглед наназад и разгледајте ги тие ситуации сега и ќе сфатите дека годините фрлаат сосема ново светло на работите.

„Ќе помине“

Сте минувале низ тинејџерски љубовни проблеми (тогаш ви се чинело дека е крај на светот), проблеми со пријатели или нешто слично и советот кој го добивате е – „ќе видиш, ќе помине“. Тогаш ви делува дека не сте слушнале нешто поглупаво – како може да помине ова ужасно чувство? На крајот секако, тие се потполно во право, затоа што оние кризни моменти што ги минувате ги минале и тие и добро знаат со што се соочувате.

„Трпение, спасение“

Вие сте на работ на нервите и го слушате ова како поддршка. Баш и не делува како некоја поддршка, нели? Во тие моменти не се ни очекува од вас да послушате, уште не ја знаете вредноста на трпението. Подоцна сфаќате што значи. Веројатно сте ја чуле и онаа дека „коцките во животот умеат да се наместат сами“. За да го потврдите тоа потребни се години во кои ќе согледате сè што ви се случило.

„Биди благодарен за она што го имаш“

Додека растете често се споредувате со останатите. Лошата финансиска состојба тешко им паѓа на децата, особено кога се наоѓаат во средина во која многумина имаат повеќе од нив. Дури не мора ни да се наоѓате во тешка финансиска состојба, доволно е некој да има нешто повеќе од вас за да се чувствувате лошо. Во тие години не го сфаќате значењето на оваа изрека. Кога ќе научите како се заработува и колку сопки може да ви направи животот на патот до една просечна заработка, ќе сфатите колку им било тешко на родителите да ви го обезбедат она што сте го имале тогаш и дека тоа е нешто што треба да се цени.

„Најдобрите работи се случуваат кога најмалку очекуваш“

На ова се надоврзува и онаа „љубовта ќе ја пронајдеш кога најмалку очекуваш“. Со малото искуство што го имате како дете, немате поим колку работи можат да се случат во иднина, а кои би имале позитивен резултат и тоа без да ги очекувате. Тогаш кога ќе се случат, ќе видите дека во животот постојат многу пријатни изненадувања.

Коментари

© 2011 boza.mk | Дизајн - element.mk