Венеција спаѓа во онаа таканаречена „must see“ листа на градови. Таа е вистински рај, и доколку ја посетувате Италија знајте дека дефинитивно вреди да се посети. Меѓутоа, токму во тоа е и проблемот, што од оваа причина таа е постојано пренатрупана со река од туристи.
Доколку спаѓате во онаа група патувачи кои сакаат да стојат понастрана од метежот, на 45 минути бавно и релаксирано пловење со брод од Венеција ќе пристигнете во прекрасното Бурано.
Станува збор за магичен колоритен остров кој се протега во северниот дел на Венецијанската лагуна. Пред многу години, жителите на Бурано ги бојадисале фасадите на нивните куќи со цел да ги разликуваат едни од други. Со оглед на тоа што повеќето од нив се занимавале со риболов, на овој начин, благодарение на ведрите бои, тие од далеку можеле да си ја видат и распознаат сопствената куќа.
Традицијата опстојала и до денешен ден, па силните бои се и понатаму препознатлив знак за Бурано. Уникатна дестинација за секој љубопитен авантурист кој ужива во патувањата.
